लङ आइल्याण्ड नेप्लिज सोसाइटी, न्युयोर्कद्वारा नेपाल बाढी राहतका लागि रुं १५ लाख सहयोग
मकै हाउस मिडिया, पुरुषोत्तम सापकोटा
न्युयोर्क, अमेरिका — मातृभूमिमा आएको प्राकृतिक विपत्ति र बाढीपहिरोबाट प्रभावित परिवारहरूको राहतका लागि न्युयोर्कको लङ आइल्याण्डस्थित प्रतिष्ठित संस्था ‘लङ आइल्याण्ड नेप्लिज सोसाइटी’ (LINSNY) ले एक उदाहरणीय मानवीय पहल सम्पन्न गरेको छ।
अमेरिकामा रहेका नेपाली तथा गैर-नेपाली समुदायको सक्रिय सहभागितामा सञ्चालित राहत संकलन अभियानमार्फत संकलित कुल ९,६७८ अमेरिकी डलर (करिब १४ लाख ८९ हजार नेपाली रुपैयाँ) नेपाल सरकारको ‘प्रधानमन्त्री दैवी प्रकोप उद्धार कोष’ (PMO Nepal) मा सफलतापूर्वक हस्तान्तरण गरिएको छ।
भौगोलिक रूपमा जन्मभूमिदेखि हजारौं माइल टाढा रहे पनि आपत्विपद्को बेला स्वदेशका दाजुभाइ तथा दिदीबहिनीको पीडामा मलम लगाउन न्युयोर्कस्थित नेपाली डायस्पोरा एक ढिक्का भएर उभिन सक्छ भन्ने यो अभियानले फेरि एकपटक प्रमाणित गरेको छ। संस्थाले पारदर्शितालाई उच्च प्राथमिकतामा राख्दै संकलित रकमबाट कुनै पनि प्रकारको प्रशासनिक कटौती नगरी शतप्रतिशत रकम सिधै सरकारी कोषमा पठाइएको र त्यसको आधिकारिक ट्रान्सफर प्रमाणसमेत सार्वजनिक गरेको छ।
प्रमुख संस्थागत तथा व्यक्तिगत सहयोग:
यس अभियानलाई भव्य रूपमा सफल बनाउन न्युयोर्क क्षेत्रका विभिन्न स्वास्थ्य संस्था, व्यावसायिक प्रतिष्ठान र उदार मन भएका महानुभावहरूले खुला हृदयले आर्थिक सहयोग गरेका छन्।
* एल्महर्स्ट अस्पताल टिम: अस्पतालको MICU, CCU, Step-Down, SICU र Respiratory Family Group को तर्फबाट संयोजक पारू थापा गिरीको समन्वयमा २,०१५ डलर संकलन भई यस अभियानमा सबैभन्दा ठूलो संस्थागत सहयोग प्राप्त भएको छ।
* व्यावसायिक तथा संस्थागत योगदान: सनसाइन रेस्टुरेन्टबाट १,००० डलर, LINSNY संस्थाको तर्फबाट ५०१ डलर, ओम्नी मोर्टगेजका धर्मिन्दर एस. भासिनबाट ५०० डलर, र बेथपेगस्थित ७-इलेभेन स्टोरबाट ३०० डलर सहयोग प्राप्त भएको छ।
* सामूहिक सहभागिता: यसबाहेक न्युयोर्कस्थित NUMC का चिकित्सकहरू, स्थानीय कर तथा लेखा व्यवसायीहरू लगायत थुप्रै नेपाली तथा गैर-नेपाली व्यक्ति र परिवारहरूले यस परोपकारी कार्यमा महत्वपूर्ण योगदान पुर्याएका छन्।
> संस्थाले जारी गरेको विज्ञप्तिमा भनिएको छ, “हाम्रो साझा उद्देश्य नेपाल र विपत्तिबाट प्रभावित परिवारहरूलाई सहयोग गर्नु हो। LINSNY मार्फत वा सिधै प्रधानमन्त्री राहत कोषमा सहयोग गर्नुहुने सम्पूर्ण महानुभावहरूप्रति हामी हार्दिक आभार व्यक्त गर्दछौं।”
>
न्युयोर्कको नेपाली समुदायमा एक सशक्त र सक्रिय संस्थाको रूपमा स्थापित LINSNY का कोषाध्यक्ष तथा संकलन अभियान संयोजक पुरुषोत्तम सापकोटा, अध्यक्ष सावित्रा सिवाकोटी, महासचिव बिशाल रेग्मी, तथा सम्पूर्ण कार्यकारी टिम, सल्लाहकार, संरक्षकहरू र सम्पूर्ण दाताहरूको संयुक्त एवं अहोरात्रको प्रयासबाट यो अभियान ऐतिहासिक रूपमा सम्पन्न भएको हो। परदेशमा रहेर पनि जन्मभूमिप्रतिको उत्तरदायित्व र सामाजिक सद्भावको यो उच्च नमुनाले अमेरिकास्थित नेपाली समुदायको शिर उच्च बनाएको छ।
