आरएस इन्टरनेशनल एनवाईद्वारा हिक्सभिल, न्युयोर्कमा बलिउड अभिनेता चंकी पाण्डेसँग विशेष भेटघाट कार्यक्रम सम्पन्न
मकै हाउस मिडिया, लॅग आईल्याण्ड संवादाता
हिक्सभिल, न्युयोर्क – आरएस इन्टरनेशनल न्युयोर्कले प्रख्यात बलिउड अभिनेता चंकी पाण्डे सँग विशेष मिट एन्ड ग्रिट (Meet & Greet) कार्यक्रम सफलतापूर्वक आयोजना गर्यो। उक्त कार्यक्रम ३२० साउथ ब्रडवे, हिक्सभिल, लङ्ग आइल्याण्डमा साँझ ७:०० बजे सुरु भएको थियो। कार्यक्रममा प्रशंसक, समुदायका सदस्यहरू र मिडिया प्रतिनिधिहरू सहभागी भई मनोरञ्जन, उत्सव र सांस्कृतिक आदान–प्रदानको माहोल सृजना गरिएको थियो।
कार्यक्रमको सुरुवातमा आरएस इन्टरनेशनल एनवाईका विद्यार्थी नृत्य कलाकारहरूले चंकी पाण्डेको लोकप्रिय चलचित्र “ओ लाल दुपट्टे वाली” गीतमा आकर्षक नृत्य प्रस्तुति दिए। उनीहरूको उत्साही प्रस्तुतिले सम्पूर्ण वातावरण उत्सवमय बनायो र दर्शकहरू तथा कलाकार स्वयंबाट ठूलो प्रशंसा प्राप्त गर्यो।
कार्यक्रमका क्रममा आरएस इन्टरनेशनल एनवाईकी निर्देशक तथा कार्यक्रम आयोजक शिल्पा झुरानीले, बलिउड कलाकार चंकी पाण्डेलाई टाउन अफ नर्थ हेम्पस्टेड (Town of North Hempstead) बाट प्राप्त विशेष सम्मान–पत्र (Citation) पाउँदा बधाई दिइन्। उक्त सम्मान उनको चलचित्र क्षेत्रमा पुर्याएको दीर्घ योगदान र अन्तर्राष्ट्रिय स्तरमा गरेको प्रभावको कदरस्वरूप प्रदान गरिएको थियो। त्यो क्षणले सम्पूर्ण उपस्थित दर्शकहरूको मन जित्यो।
अतिथिहरूले त्यसपछि चंकी पाण्डेसँग प्रत्यक्ष भेटघाट, फोटोसेसन र अनौपचारिक कुराकानी गर्ने अवसर पाए। कार्यक्रमको माहोल उत्साह, आत्मीयता र खुशीले भरिएको थियो। तीन दशकभन्दा बढी समयदेखि भारतीय चलचित्र क्षेत्रमा सक्रिय पाण्डे आफ्नो बहुमुखी अभिनय र आकर्षक व्यक्तित्वका कारण सधैं दर्शकको मनमा बसेका छन्।
यस कार्यक्रममा मार्फत आरएस इन्टरनेशनल एनवाई ले दक्षिण एशियाली कलाकार र विश्वव्यापी प्रशंसकहरूलाई जोड्ने कार्यलाई निरन्तरता दिएको देखियो। यस्ता कार्यक्रमहरूले सांस्कृतिक एकता मजबुत बनाउने र भारतीय चलचित्रको अन्तर्राष्ट्रिय प्रभावलाई उजागर गर्ने महत्वपूर्ण भूमिका खेलिरहेका छन्।
कार्यक्रमको अन्त्यमा फोटो सेसन, आत्मीय संवाद र आयोजक तथा कलाकारबीच धन्यवाद आदान–प्रदानका साथ यो साँझ सफल र यादगार बन्यो।
