न्युयोर्क सिटीको ‘Best 100 Restaurants’ को सूचीमा नेपाली भान्छाघर

मकैहाउस सामुदायिक मिडिया, अक्कल तामाङ

न्युयोर्क । अमेरिकाको चर्चित पत्रिका The New York Times ले सार्वजनिक गरेको सन् २०२६ को “New York City’s 100 Best Restaurants” सूचीमा क्विन्स, ज्याक्सन हाइटस्थित नेपाली रेस्टुरेन्ट नेपाली भन्छा घर पर्न सफल भएको छ। यो उपलब्धिसँगै नेपाली परिकार र नेपाली समुदायले अन्तर्राष्ट्रिय स्तरमा थप ठूलो पहिचान बनाएको छ।

रेस्टुरेन्टकी सञ्चालिका बिमला हमाल श्रेष्ठको नेतृत्वमा सञ्चालन हुँदै आएको भान्छाघरले नेपाली मौलिक स्वाद, पारिवारिक आतिथ्यता र परम्परागत परिकारमार्फत न्युयोर्कको बहुसांस्कृतिक खाद्य बजारमा विशेष स्थान बनाएको मानिन्छ। विशेषगरी मःम, सेलरोटी, झोल मःम, थकाली परिकार लगायत नेपाली खानाको स्वादले नेपाली भन्दा विदेशी ग्राहकहरुको ध्यान केन्द्रित गरेको छ ।

भान्छा घर अहिले केवल नेपाली समुदाय मात्र नभई, सम्पूर्ण न्युयोर्कको बहुसांस्कृतिक खानाप्रेमीहरूको रोजाइ बन्दै गएको छ। न्यूयोर्क टाइम्सले आफ्नो सूची तयार गर्दा “imagination, ambience, service, technique, passion, commitment and sheer deliciousness” लगायतका पक्षलाई आधार बनाएको जनाएको छ।