इर्भिङको रेस्टुरेन्टमा हिंसात्मक आक्रमण, चार नेपाली युवक पक्राउ
मकै हाउस सामुदायिक मिडिया,
टेक्सास। अमेरिकाको टेक्सासस्थित इर्भिङ शहरको एक रेस्टुरेन्टमा भएको सामूहिक झडपका क्रममा एक व्यक्तिमाथि गम्भीर आक्रमण गरेको आरोपमा चार जना नेपाली मूलका युवक पक्राउ परेका छन्। उनीहरूमाथि गम्भीर शारीरिक चोट पुर्याएको अभियोगमा ‘एग्राभेटेड असल्ट’ (गम्भीर प्रकृतिको आक्रमण) सम्बन्धी मुद्दा लगाइएको छ।
इर्भिङ प्रहरी विभागका अनुसार जुलाई २, बिहीबार मध्यरातपछि वेस्ट एयरपोर्ट फ्रिवे (एसएच–१८३) को ३४०० ब्लकमा रहेको पिक रेस्टुरेन्ट एन्ड बारमा ठूलो झडप भएको सूचना प्राप्त भएको थियो। घटनामा करिब १५ देखि २० जना संलग्न रहेको तथा रेस्टुरेन्टभित्र केही व्यक्तिले एकअर्कामाथि बियरका बोतलसमेत प्रहार गरेको प्रहरीलाई जानकारी दिइएको थियो।
घटनास्थलमा पुगेका प्रहरी अधिकारीहरूले रेस्टुरेन्टको सुरक्षा क्यामेरामा कैद भएको दृश्यको समीक्षा गरेका थिए। उक्त भिडियोमा चार जनाले एक व्यक्तिमाथि आक्रमण गरेको देखिएको अनुसन्धानकर्ताहरूले बताएका छन्।
प्रहरीले संदिग्ध व्यक्तिहरूको हुलिया संकलन गरी खोजी गर्ने क्रममा चारै जना र घाइते व्यक्तिलाई इर्भिङस्थित बेलर स्कट एन्ड ह्वाइट मेडिकल सेन्टरमा फेला पारेको जनाएको छ। निगरानी क्यामेराको भिडियोबाट घटनामा प्रत्येक आरोपितको संलग्नता पुष्टि भएको प्रहरीको दाबी छ।
अनुसन्धानकर्ताका अनुसार ३१ वर्षीय सुरज बस्नेतले पीडित व्यक्तिको टाउकोमा पटक–पटक मुक्का र लात प्रहार गरेको भिडियोमा देखिएको छ। अन्य आरोपितहरूले पनि मुक्का, लात, कुर्सी तथा सिसाका बोतल प्रयोग गरी आक्रमण गरेको आरोप लगाइएको छ।
आक्रमणबाट पीडितको टाउकोमा गहिरो चोट लागेको र टाँका लगाउनुपरेको बताइएको छ। उनका ओठ फुट्नुका साथै घाँटीमा चोट तथा काटिएको घाउ देखिएको छ। पीडितलाई मस्तिष्कमा चोट वा ‘कन्कसन’ भएको हुन सक्ने आशंका गरिएको भए पनि त्यससम्बन्धी स्वास्थ्य परीक्षणको अन्तिम नतिजा आउन बाँकी रहेको प्रहरीले जनाएको छ।
प्रहरीका अनुसार सुरज बस्नेत, २९ वर्षीय धिरज बस्नेत, २२ वर्षीय अमित खत्री–नेपाल र २२ वर्षीय शोइब खड्काविरुद्ध गम्भीर शारीरिक क्षति पुर्याएको आरोपमा ‘एग्राभेटेड असल्ट’ मुद्दा दर्ता गरिएको छ। टेक्सासको कानुनअनुसार उक्त अभियोग दोस्रो श्रेणीको गम्भीर अपराध (सेकेन्ड–डिग्री फेलोनी) अन्तर्गत पर्दछ।
चारै जनामाथि आरोप लगाइएको भए पनि अदालतबाट दोषी ठहर नभएसम्म उनीहरूलाई कानुनी रूपमा निर्दोष मानिनेछ।
