जर्मनी तथा रियल मड्रिडका स्टार डिफेन्डर एन्टोनियो रुडिगरले राष्ट्रिय टोलीबाट सन्यास लिएका छन् ।
मकै हाउस मिडिया,
न्युयोर्क । जर्मनी तथा रियल मड्रिडका स्टार डिफेन्डर एन्टोनियो रुडिगरले राष्ट्रिय टोलीबाट सन्यास लिने घोषणा गरेका छन्।
रुडिगरले सामाजिक सञ्जालमार्फत केही समयको आत्मचिन्तनपछि राष्ट्रिय टोलीमा आफ्नो करियर अन्त्य गर्ने निर्णय गरेको बताएका हुन्। उनले अब युवा पुस्ताका खेलाडीलाई अवसर दिने समय आएको उल्लेख गरेका छन्।
रुडिगरले सन् २०१४ मा पहिलोपटक जर्मनीको राष्ट्रिय टोलीको जर्सी लगाएका थिए। त्यसयता उनले जर्मनीका लागि ८६ अन्तर्राष्ट्रिय खेल खेलेका छन्।
आफ्नो सन्देशमा उनले राष्ट्रिय टोलीसँगको यात्रा आफ्नो जीवनको अत्यन्त विशेष अध्याय भएको बताएका छन्। पछिल्ला प्रतियोगितामा ठूला उपाधि जित्न नसके पनि टोलीसँग बिताएको समयले आफूलाई सधैं परिभाषित गर्ने उनले उल्लेख गरेका छन्।
रुडिगरले आफ्ना सहकर्मी, प्रशिक्षक तथा सहयोगी टोलीलाई धन्यवाद दिँदै विशेष रूपमा जोआखिम लो, हान्सी फ्लिक र जुलियन नागेल्समानको योगदान स्मरण गरेका छन्। साथै, जर्मनीका समर्थकहरूलाई पनि उनले निरन्तर साथ र समर्थनका लागि धन्यवाद दिएका छन्।
विशेषगरी युरोपियन च्याम्पियनसिप २०२४का क्रममा घरेलु मैदानमा समर्थकहरूले सिर्जना गरेको वातावरण आफ्नो लागि अविस्मरणीय रहेको रुडिगरले बताएका छन्।
राष्ट्रिय टोलीबाट बिदा लिएसँगै रुडिगरले अब आफ्नो सम्पूर्ण ध्यान क्लब करियरमा केन्द्रित गर्ने बताएका छन्।
“हामीले सँगै बिताएको यात्राका लागि धन्यवाद।” — एन्टोनियो रुडिगर
