क्यालिफोर्नियामा एनआरएनए एनसिसी अमेरिका २०२५-२७ अध्यक्ष पदका प्रत्यासी सतेन्द्र साह संग “मिट एण्ड ग्रिट” सम्पन्न

अध्यक्षका प्रत्याशी साह विगत २० वर्षदेखि अमेरिकी नेपाली समाजमा उल्लेखनीय योगदान पुर्‍याएका एक सामाजिक व्यक्ति हुन् । उनले मधेसी एसोसिएसन ईन अमेरिकाको पूर्व अध्यक्ष, नेपाल डे परेड न्यु योर्क पूर्व कन्भेनर, न्युजर्सीको इतिहासमा पहिलो पटक सम्पन्न “नेपाल डे ईन फेयर लन, न्यु जर्सी २०२५” को कन्भेनर र गैह्र आवासीय नेपाली सङ्घ  राष्ट्रिय समन्वय परिषद् अमेरिका र अन्तर्राष्ट्रिय समन्वय परिषद्को विभिन्न पदमा रही सफलतापूर्वक आफ्नो उत्तरदायित्व पुरा गरिसकेका छन् । शाहले अध्यक्ष पदमा दिएको उम्मेदवारीलाई यिनै कारणहरूले गर्दा क्यालिफोर्नियावासी नेपालीहरूलाई  समर्थनका लागि अनुरोध गरिरहेका छन् । 

कार्यक्रममा बोल्दै साहले गैर आवासीय नेपाली सङ्घ अन्तर्राष्ट्रिय समन्वय परिषद्ले निकालेको निर्वाचन तालिका अनुसार जनसमुदायलाई आग्रह गरेका छन् । ‘हजुरहरूले मप्रति देखाउनुभएको मायालाई यसपालि आस गर्दै हजुरहरूको मप्रतिको विश्वासलाई रति पनि डगमगाउन दिने छैन भन्ने अठोट गर्न चाहन्छु । यस पटकको निर्वाचनमा यहाँहरूले मलाई अत्यधिक मतका साथ विजयी गराई  सेवा गर्ने मौका दिनुहुनेछ भन्ने कुरामा पूर्ण विश्वस्त छु’, उनले भनेका छन्, ‘एक थुकी सुकी, सयौँ थुकी नदी भने जस्तै हजुरहरूको एक–एक भोट नै मेरो जीतको आधार बन्ने छ भन्ने कुरामा म पूर्ण विश्वस्त छु । हजुरहरूको म प्रतिको आशा र भरोसालाई कति पनि डगमगाउन दिने छैन ।’

उम्मेदवार साहले थपे, ‘आफ्नो काम र कर्तव्य प्रति पूर्ण रूपमा बफादार भएर एउटा सिपाहीको रूपमा अबको दुई वर्ष गैर आवासीय नेपाली सङ्घमा केन्द्र र  च्याप्टरहरूको विकास र समस्यालाई समाधान गर्दै अगाडी बढ्ने कुरामा विश्वास दिलाउन चाहन्छु ।’ उनले  सबैको सुझाव अनुसार नै आफ्नो कार्यकालमा पूर्ण रूपमा कार्यान्वयन गर्ने प्रतिबद्धता व्यक्त गरेका छन् ।