न्यूयोर्क नेपाली सामुदायिक तथा सांस्कृतिक केन्द्र विस्तारका लागि ९ लाख अमेरिकी डलर संघीय अनुदान प्राप्त
मकै हाउस मिडिया,
न्यूयोर्क — रिजउड नेपाली समाज (RNS) ले न्यूयोर्कको रिजउडस्थित नेपाली सामुदायिक तथा सांस्कृतिक केन्द्र को मर्मत तथा विस्तारका लागि ९ लाख अमेरिकी डलर (USD $900,000) बराबरको संयुक्त राज्य अमेरिकाको संघीय अनुदान प्राप्त गरेको औपचारिक घोषणा गरेको छ।
उक्त संघीय सहयोग हालै पारित भई संयुक्त राज्य अमेरिकाका राष्ट्रपतिद्वारा हस्ताक्षरित आर्थिक वर्ष (FY) २०२६ को संघीय बजेट प्याकेज अन्तर्गत सम्भव भएको हो। यो अनुदान यातायात, आवास तथा शहरी विकास (THUD) विनियोजन प्रक्रिया अन्तर्गत सुरक्षित गरिएको हो। यस ऐतिहासिक उपलब्धिमा न्यूयोर्कबाट निर्वाचित अमेरिकी सिनेटर माननीय चक शुमर (Chuck Schumer) को नेतृत्व र पहल महत्वपूर्ण रहेको थियो।
नेपाली सामुदायिक तथा सांस्कृतिक केन्द्र सांस्कृतिक सम्पदा संरक्षण, भाषा तथा परम्पराको प्रवर्द्धन, युवा नेतृत्व विकास, ज्येष्ठ नागरिक सेवा, अन्तरपुस्ते संवाद तथा सामुदायिक सशक्तीकरणको प्रमुख केन्द्रका रूपमा स्थापित हुँदै आएको छ। प्रस्तावित मर्मत तथा विस्तार योजनाले केन्द्रको भौतिक क्षमता वृद्धि, पहुँचयोग्यता र सुरक्षा सुधार गर्नुका साथै भावी पुस्ताका लागि नेपाली कला, संस्कृति र परम्पराको संरक्षण सुनिश्चित गर्ने लक्ष्य राखेको छ।
सिनेटर शुमरले भन्नुभयो:
“रिजउड नेपाली समाजका लागि ऐतिहासिक ९ लाख अमेरिकी डलर संघीय अनुदान उपलब्ध गराउन पाउँदा म गर्व अनुभव गर्दछु। यो उनीहरूको पहिलो संघीय अनुदान हो, जसले क्वीन्सस्थित नेपाली सामुदायिक तथा सांस्कृतिक केन्द्रको मर्मत तथा विस्तारमा महत्वपूर्ण योगदान पुर्याउनेछ। यस्ता परियोजनाहरूले बढ्दो नेपाली-अमेरिकी समुदायलाई अत्यावश्यक सेवाहरू उपलब्ध गराउनेछन्, विशेषगरी नयाँ आप्रवासी नेपालीहरूका लागि। यस्ता पहलहरूले न्यूयोर्कवासीहरूको जीवनमा सकारात्मक परिवर्तन ल्याउनेछ। हाम्रो समुदायलाई अझ सुदृढ बनाउन आवश्यक स्रोतसाधन उपलब्ध गराउन म निरन्तर प्रयासरत रहनेछु।”
रिजउड नेपाली समाजले सिनेटर शुमरप्रति हार्दिक कृतज्ञता व्यक्त गर्दै नेपाली-अमेरिकी समुदायको योगदानलाई संघीय तहमा मान्यता दिलाउन उहाँले निर्वाह गर्नुभएको भूमिकाको उच्च प्रशंसा गरेको छ। साथै, यस महत्वपूर्ण लगानी सम्भव बनाउन सहयोग पुर्याउने संयुक्त राज्य अमेरिकाको संघीय सरकार तथा सम्पूर्ण विधायिकाहरूप्रति पनि समाजले आभार प्रकट गरेको छ।
रिजउड नेपाली समाजका सरकार सम्बन्ध तथा अनुदान समितिका संयोजक अमित प्रताप शाहले भन्नुभयो:
“यो संघीय अनुदान केवल पूर्वाधार विकासको रकम मात्र होइन — यो हाम्रो समुदायको पहिचान, साझेदारी र अवसरको मान्यता हो। आजको उपलब्धिले देखाउँछ कि जब एकीकृत सामुदायिक सहभागिता र रणनीतिक पैरवी स्थानीय, राज्य तथा संघीय तहको उत्तरदायी नेतृत्वसँग समन्वय हुन्छ, तब ऐतिहासिक उपलब्धि सम्भव हुन्छ। यो हाम्रो दीर्घकालीन सामूहिक प्रयासको परिणाम हो। यो सुरुवात मात्र हो। नेपाली-अमेरिकी पहिचानको संरक्षण, सांस्कृतिक सम्पदाको जगेर्ना, एकीकरण सुदृढीकरण तथा संस्थागत विकास र सामुदायिक सशक्तीकरणका लागि आगामी दिनमा निरन्तर सहकार्यको अपेक्षा गर्दछौं।”
रिजउड नेपाली समाजले प्रत्यक्ष तथा अप्रत्यक्ष रूपमा सहयोग, मार्गदर्शन र समर्थन प्रदान गर्ने सम्पूर्ण नेपाली-अमेरिकी समुदायप्रति विशेष धन्यवाद ज्ञापन गरेको छ। यस सफलताले एकता, साझा जिम्मेवारी र सामूहिक प्रतिबद्धताको उदाहरण प्रस्तुत गरेको समाजले जनाएको छ।
रिजउड नेपाली समाजका अध्यक्ष राजेश भट्टले भन्नुभयो:
“यो उपलब्धि सम्पूर्ण समुदायको हो। यो संघीय अनुदान केवल सामुदायिक तथा सांस्कृतिक केन्द्रको मर्मत तथा विस्तारका लागि निर्दिष्ट गरिएको हो भन्ने कुरा स्पष्ट गर्न चाहन्छौं। यद्यपि यो ऐतिहासिक सफलता हो, यो परियोजनामुखी अनुदान भएकाले भवन खरिद तथा विकाससँग सम्बन्धित करिब १० लाख अमेरिकी डलर बराबरको बाँकी ऋण दायित्व यसबाट समेटिएको छैन। त्यसैले हाम्रो संस्थाको दीर्घकालीन स्थायित्वका लागि समुदायको निरन्तर सहयोग अपरिहार्य छ। हामी सम्पूर्ण समुदायसँग निरन्तर सहभागिता तथा सहयोगका लागि हार्दिक अनुरोध गर्दछौं, ताकि हामी मिलेर केन्द्रको दीर्घकालीन लक्ष्य साकार पार्न सकौं।”
रिजउड नेपाली समाजले यस संघीय अनुदानको जिम्मेवार रूपमा उपयोग गर्दै हाम्रो सांस्कृतिक गौरव, सम्पदा संरक्षण, सामाजिक एकीकरण, आर्थिक सशक्तीकरण तथा संस्थागत स्थायित्व प्रवर्द्धन गर्ने दीर्घकालीन कार्यक्रमहरू अघि बढाउने प्रतिबद्धता व्यक्त गरेको छ।
